बिहीबार, ११ असार, २०८३
बिहीबार, ११ असार, २०८३
राष्ट्रिय सन्देश संबाददाता, २ घण्टा पहिले
२०८३ असार ११, चितवन । चितवनको भरतपुरमा जारी राष्ट्रिय स्वतन्त्र पार्टी (रास्वपा) को ऐतिहासिक प्रथम महाधिवेशनमा नयाँ नेतृत्व चयनका लागि मतदान प्रक्रिया सुरु भएको छ ।
मतदान सुरु भएसँगै प्रतिनिधिहरू महाधिवेशन हलमा प्रवेश गर्न थालेका छन् । असार ७ गतेदेखि सुरु भएको महाधिवेशनमा मतदान आज बिहान १० बजेसम्म जारी रहने बताइएको छ ।
रास्वपा केन्द्रीय निर्वाचन आयोगका प्रमुख भुवन केसीका अनुसार पार्टीका विभिन्न ९९ पदका लागि विद्युतीय प्रविधि (इलेक्ट्रोनिक भोटिङ) मार्फत मतदान सुरु गरिएको हो । मतदान प्रक्रिया सुरु भएसँगै देशभरबाट आएका महाधिवेशन प्रतिनिधिहरू मतदानका लागि हलमा उत्साहपूर्वक प्रवेश गरिरहेका छन् ।
यही असार ७ गतेदेखि सुरु भएको यस गरिमामय महाधिवेशनको अन्तिम चरण अन्तर्गत आज बिहान १० बजेसम्म मतदान जारी रहने निर्वाचन आयोगले जनाएको छ । नयाँ कार्यसमितिमा आउनका लागि प्रतिनिधिहरूमाझ तीव्र प्रतिस्पर्धा देखिएको छ, जहाँ कुल ९९ सिटका लागि ३ सय ८४ जना उम्मेदवारहरू चुनावी मैदानमा उत्रिएका छन् ।
यसअघि नै पार्टीको सर्वोच्च पद सभापतिमा भने वर्तमान सभापति रवि लामिछाने निर्विरोध निर्वाचित भइसक्नुभएको छ । शीर्ष नेतृत्व सर्वसम्मत चुनिए पनि अन्य महत्त्वपूर्ण केन्द्रीय पदहरूका लागि भने प्रतिनिधिहरूले लोकतान्त्रिक विधिबाट विद्युतीय माध्यम प्रयोग गरी आफ्नो मताधिकार प्रयोग गरिरहेका छन् ।
